Shkenca shqiptare, përmes shkencëtarëve të saj, jo vetëm në vendet e origjinës, por edhe të atyre që janë të shpërndarë nëpër botë, po kontribuon në vazhdimësi dhe me cilësi të lartë në ngritjen dhe zhvillimin e shkencës mbarëbotërore.

Rast më i freskët i vlerësimit të shkencëtarëve shqiptarë për kontributin e tyre për shkencën në përgjithësi dhe për institucionin shkencor në veçanti, është rasti i profesorit Bajram Berishës nga Universiteti i Prishtinës.Në vigjilje të 150-vjetorit të themelimit të Universitetit Teknik të Munihut (TUM), Prof. Bajram Berisha është nderuar me titullin prestigjioz “TUM Ambassador” i Universitetit Teknik të Munihut (TUM – Technische Universität München) në Gjermani.

KosovaPress ka arritur të sigurojë fotografi dhe video nga një ceremonie festive që u organizua me këtë rast nga TUM prej datës 30 nëntor deri më 2 dhjetor të vitit që lamë pas, në Filarmoninë e Munihut, me moton “Një herë i ftuar, përgjithmonë mik”.

TUM është njëri nga institucionet elitare të arsimit të lartë dhe të ekselencës shkencore në Gjermani dhe në botë. Aktualisht, sipas rangimit në listën e Shangait, TUM radhitet ndër 50 Universitetet më të mira në botë dhe ndër 2-3 Universitetet më të mira në Gjermani.

Në fjalën përshëndetëse gjatë ceremonisë së dorëzimit të titujve, presidenti i TUM, Prof. Ëolfgang Herrmann, shprehu falënderimin e tij për kontributin e jashtëzakonshëm të “TUM Ambasadoreve” në ngritjen e imazhit të TUM. Ambasadorët e TUM, tha ai e pasurojnë Universitetin me përvojën e tyre shkencore-akademike dhe praktikën e tyre ndërkombëtare.

Ai mes tjerash tha se cilësinë e universitetit tonë e mbështesim edhe në bashkëpunimin e vazhdueshëm me shkencëtarët dhe institucionet e ekselencës gjithandej nëpër botë. Prandaj, çdo vit, Presidenti i TUM nderon disa nga shkencëtarët ndërkombëtarë të nivelit kulmor me titullin “TUM Ambassador” duke i cilësuar ata si përfaqësues të këtij Universiteti nëpër botë. Këtë vit Presidenti i TUM ka përzgjedhur Ambasadorët nga universitete prestigjioze nga ShBA, Kina, Franca, Kosova, Rusia, Holanda dhe Japonia.

Biografinë e “TUM Ambasadoreve 2018”, para rreth 2500 Profesorëve, studentëve të TUM dhe mysafirëve të tjerë të koncertit të filarmonisë së Munihut e lexoj Zëvendës-presidentja e TUM, Prof. Julinae Winkelmann. Ajo duke e ftuar Profesorin Bajram Berisha, ambasadorin e parë gjatë kësaj ceremonie, ka potencuar rezultatet të ekselencës shkencore dhe bashkëpunimin e jashtëzakonshëm të Prof. Berishës me TUM. Profesor Berisha, theksoj ajo është profesor i fiziologjisë, gjenetikës dhe bioteknologjisë shtazore me ekspertizë dhe reputacion te shkëlqyer shkencor dhe universitar. Zëvendës-presidentja Ëinkelmann gjatë laudacionit rikujtoj se Prof. Berisha vjen nga Universiteti i Prishtinës në Kosovë, por qe ka punuar kohe të gjatë në TUM dhe ka dhënë një kontribut të jashtëzakonshëm në internacionalizimin e TUM, dhe ngritjen e reputacionit dhe imazhit të këtij universiteti.

Emërimi i Prof. Bajram Berishës “TUM Ambassador” në këtë universitet të famshëm të ekselencës gjermane dhe ndërkombëtare, është një kontribut i rëndësishëm në ngritjen e reputacionit dhe ndërkombëtarizimin të Universitetit të Prishtinës dhe të arsimit të lartë dhe të shkencës shqiptare.